Талун  медбӧр туйӧ ми колльӧдам   Яков Степанович Филипповӧс. Сiйӧ ӧсӧбӧй морт. Олiс аслас принципъяс кузя. ӧнi татшӧм мортыс этша. Сы серти мый и властьыслӧн, и государствоыслӧн вошiны принципъясыс, абу веськыд туй визьыс. ӧнi вылас уна  гусясьысь да пӧръясьысь йӧз.

Яков Степановичӧс пӧмнитам райсовета сессияяс кузя. Сiйӧ пыр чорыда сулалiс Вертепса  йӧз помлась, Красноборса интересъяс помлась да Ижмаса народ помлась, чистӧй му да чистӧй сынӧд помлась. Кор сiйӧ асьсӧ лыддис правӧн, вермис мунны ӧтнас  став депутатыслы водзча. Медбӧр  выборъяс дырйи  аслас принципъяс серти сiйӧс даже, кыдз ми думайтам, из лэдзны лоны кандидатӧн райсоветӧ. Буракӧ, ӧнiя властьлы татшӧм йӧзыс оз ков.

Медбӧр  дас восӧ  ми Яков Степановичкӧд тшӧтш лэдзим «Веськыд сёрни» газет.  Яков  Степановичлӧн пыр вӧлi дась пословича, стих или священӧй писаниеысь лӧсялана предложение. И став сылӧн статьяыс вӧлi  есь, но абу скӧр, а точнӧй да серама. И сiйӧн пыр йӧзыс унаысь лыддисны сылысь гижӧдъяссӧ.

Медбӧр «Веськыд сёрни» газетӧ  сiйӧ  бара гижiс. Но статьясӧ, газетсӧ  из нин аддзы, из нин лыддьы, из нин паськӧд  Вертепса йӧз костын.

Жаль, абу на сылӧн кулан пӧра. Из на тыр сылы 70 ар. А ми сiйӧ колльӧдам медбӧр туйӧ.

Мыжаӧсь ми сы водзын, мый иг пыр дорйӧ, кор вӧлi сiйӧ прав, мыжаӧсь сы водзын, мый  олыгас  этшаджык  ошким да тӧждысим сы вӧсна. Прӧстит миянӧс, Яков Степанович, друг да ӧтлаын уджалысь ерт. Мед муыс лоас тэн небыд да шоныд вольпасьӧн.

Прӧстит миянӧс да прӧщай.

А. Истомин, Н. Братенков