Миян Ижма медся дона

Главная | Мой профиль | Регистрация | Выход | Вход
Главная » 2017 » Май » 23 » ПУЖъяліс
20:22
ПУЖъяліс

Григорий Хатанзейский

Редакцияӧ шыӧдчис Изьва районса Щельяюр посёлокысь Анатолий Артеев. Мортыс зэв водзмӧстчысь, нырччӧ общественнӧй уджӧ, сьӧлӧмнас висьӧ национальнӧй республикалӧн тыр-бур аскиа лун вӧсна да нелючкитӧ паныдалігӧн, дерт, чӧв оз ов. 
«Кыкысь ветлі миян пошта юкӧнӧ, медым гижӧдчыны «Коми му» вылӧ, но эз могмӧдны — каталогас пӧ татшӧм газетыс абу, — висьтасис Анатолий Иванович. — Гортын интернет пыр видлі, да нинӧм жӧ эз артмы...» 
Энлы, мися, дона ёрт, эн майшась, звӧнитла поштасаыдлы — петкӧдла налы ПУЖ! 
Звӧниті Щельяюрса поштаӧ, шыасис нывбаба. Висьтаси, коді ме да кутшӧм могӧн дӧзмӧдча, а нывбабаыд тайкӧ матькыштас: «Сыктывкарӧдз нин со кывсьӧма!..» 
«Тіянӧс нӧ эз на тупкыны? —весьӧпӧртіс юалӧмӧн поштаын зільысь. — Ми тай тіянӧс асланым каталогысь ог аддзӧй-а. «Трибуна» со эм, «Республика» эм, а «Чушканзі» ни «Коми му» абу... Колӧкӧ, гижӧдчан индексныд вежсис да?..» 
Забеднӧ лои: туясям-эрдӧдам, нускам-гижам, йӧзӧдам-ыстам, а газет-журнал йылысь весиг шӧр гижӧдысьным нинӧм оз тӧд. Кытчӧ нӧ либӧ некымын сюрса тиражыс разалӧ? Дивӧ тай!.. 
Кӧть мый, но туйпомсӧ колӧ кытыськӧ корсьны. Шыӧдчим «Россияса пошталӧн» республикаса филиалӧн веськӧдланінын подписка вӧсна кывкутысьяс дінӧ. Сэтчӧсса эскӧдісны, ставыс пӧ лючки, некутшӧм мытшӧд абу, каталогысь тіянӧс некод эз кирит... Вӧлӧмкӧ, вежӧмаӧсь сӧмын миян газет-журналлысь сідз шусяна индексъяс. А щельяюрсаыд пӧ, тыдалӧ, велалӧма корсьны «коми муястӧ» гижӧдчан каталогысь буретш тайӧ лыдпасъяс сертиыс, кӧть эськӧ тырмымӧн сӧмын нимсӧ пасйыны... Энлӧй, звӧнитлам пӧ ӧні сылы, петкӧдлам ПУЖ!.. 
Ог ылӧдлы, жаль лои посёлокса нывбабаыд. Коньӧрӧйлы, мися, ок, и сюралас, уджсӧ на воштас, нажӧткатӧг коляс. Гортас воас, а челядьыс порог дорсянь шашаритчасны сылы соскас да пондасны кальсыпи моз чипсасьны — ӧтилы кампет колӧ, мӧдлы — мича джинсы... Ойя да ойя!.. 
Эг на удит кылӧдны курыд думъясӧс гоз-мӧд чашка чайӧн, пызан вылысь чеччыштлӧмӧн триньӧбтіс уджвывса телефон. Видзчысьӧмӧн лэпті трубка. Щельяюрсянь пӧ... 
«Нелючкисӧ бырӧдӧма! — шыаліс поштасалӧн шуда гӧлӧс. —/ні вермам кӧть кодӧс «Коми му» вылад гижӧдны! Анатолий Ивановичӧс могмӧдам и, гортӧдзыс ветлам... — сэсся шмонитӧмӧн содтіс: — Петкӧдлам сылы ПУЖ!..» 

 

Просмотров: 553 |
Всего комментариев: 0
Имя *:
Email:
Код *: